შეცვლის სანქციების მე-11 პაკეტი საქართველოში ავტომობილების ბიზნესსა და ფასებს?

თბილისმა ბრიუსელთან მოლაპარაკებები დაიწყო, რათა სანქციების ახალი პაკეტის გამო საქართველოდან რუსეთში მსუბუქი ავტომობილების ექსპორტი არ შეჩერდეს.

საქართველოს მთავრობა აცხადებს, რომ საერთაშორისო სანქციებს ემორჩილება და ამის მიუხედავად რუსეთთან ავტომობილებით ვაჭრობას აგრძელებს.

მოლაპარაკებების წარუმატებლად დასრულების შემთხვევაში, საქართველოს, შესაძლოა, მოუწიოს, აკრძალოს ევროპიდან შემოყვანილი ავტომობილების რეექსპორტი რუსეთში.

მარტივად გიამბობთ:
როგორ დადგა საქართველო ამ რეალობის წინაშე;
როგორ შეიძლება, შეზღუდვამ ცოტა ხნით მაინც გააიაფოს ავტომობილები;
რა გავლენას მოახდენს აკრძალვა საავტომობილო ბიზნესზე.

სანქციების ახალი პაკეტი

2022 წლის მარტიდან ევროკავშირის მიერ რუსეთისთვის დაწესებულ სანქციებში ექცევა ავტომობილები, რომელთა ღირებულება 50 000 ევროს აღემატება. რუსეთში ევროპული წარმოების ასეთი ავტომობილების გაყიდვა აკრძალულია.

საქართველოს ფინანსთა მინისტრის მტკიცებით, საქართველოში იმპორტირებული ავტომობილების 99% არის ან მეორადი, ან ახალი, მაგრამ იაფი. შესაბამისად, ევროკავშირის შეზღუდვა საქართველო-რუსეთის ავტომობილების ვაჭრობაზე დიდად არ აისახება. თუმცა იყო ეჭვები სანქციებისგან თავის არიდების შემთხვევებზე.

მას შემდეგ, რაც ძვირადღირებული მანქანების რუსეთში გაყიდვა აიკრძალა და ევროპულმა მწარმოებლებმა ქვეყანა დატოვეს, რუსეთის ბაზარი სწრაფად გადაეწყო ახალ რეალობაზე. პლატფორმა „აუტოსტატის“ მონაცემებით, 2022 წელს რუსეთში გაყიდული ავტომობილების 75% მეორადი იყო.

ევროკავშირმა ახალ რეალობასთან ბრძოლა დაისახა მიზნად. 2023 წლის 23 ივნისს მიღებულმა, სანქციების ახალმა, მე-11 პაკეტმა აკრძალვა გაავრცელა:
„ყველა ახალ და მეორად ავტომობილზე, რომელთა ძრავის მოცულობა აღემატება 1900 კუბურ სანტიმეტრს [ანუ 1.9-ზე მაღალი ძრავის მქონე ავტომობილებზე - როცა ყველაზე პოპულარული 2.0 ძრავაა];
ყველა ელექტრონულ და ჰიბრიდულ ავტომობილზე“.

მე-11 პაკეტი ასევე მოიცავს სანქციებისათვის თავის არიდების საწინააღმდეგო ახალ ზომებს, რომელიც ბრიუსელმა შესაძლოა, „მესამე ქვეყნების“ წინააღმდეგ გამოიყენოს.

ნებისმიერ შემთხვევაში: თუ ქვეყანა ევროკავშირის სანქციებს ემორჩილება, ასეთი მანქანები რუსეთში აღარ უნდა გაიყიდოს. მაგრამ პრობლემა სწორედ ამაშია: საქართველოს მთავრობა აცხადებს, რომ სრულად უერთდება ევროკავშირის სანქციებს, მაგრამ რუსეთთან ავტომობილებითაც ვაჭრობს. მეტიც, - რუსეთთან პირდაპირ თუ ირიბად ავტომობილებით ვაჭრობა მზარდი საავტომობილო ბიზნესის მნიშვნელოვანი ნაწილია.

სტატისტიკა მზარდია

2023 წლის ხუთ თვეში საქართველოში $1 მლრდ-ის ღირებულების მსუბუქი ავტომობილები შემოიყვანეს და $795 მლნ-ისა ექსპორტზე გაიყვანეს. ექსპორტის 100% რეექსპორტი იყო - საქართველო თავად არ აწარმოებს ავტომობილებს - ჯერ აქ ჩამოჰყავთ, აქედან კი სხვა ქვეყნებში გაჰყავთ.

წინა წლის შესაბამის პერიოდთან შედარებით, მანქანების ექსპორტი გაორმაგებულია, იმპორტი კი გაოთხმაგებული. და ეს მაშინ, როდესაც 2022 წელს უკვე ჩანდა პოსტპანდემიური აღდგენა.

წყარო: radiotavisupleba.ge