III კვარტალში ყველაზე მეტი საზღვრის კვეთა რუსეთთან დაფიქსირდა - შსს

2023 წლის მესამე კვარტალში საქართველოში საზღვრის კვეთების რაოდენობამ ჯამში 7 180 916 შეადგინა. შსს-ის მიერ გამოქვეყნებული სტატისტიკის მიხედვით, კვეთების 76% უცხოელებზე მოდიოდა, ხოლო 24% ადგილობრივებზე.

საქართველოს სახელმწიფო საზღვარზე გადაადგილებული უცხო ქვეყნის მოქალაქეების მონაცემების მიხედვით, ივლისში, აგვისტოსა და სექტემბერში სულ 2 689 306 შემოსვლა და 2 734 526 გასვლა დაფიქსირდა. ორივე მაჩვენებელი გასული წლის რიცხვებს აღემატება. შედარებისთვის გეტყვით, რომ 2022 წლის III კვარტალში უცხო ქვეყნის მოქალაქეების 2 267 523 შემოსვლა, 2 238 635 კი გასვლა დაფიქსირდა.

თუმცა 2023 წლის მესამე კვარტალში უცხო ქვეყნების მოქალაქეების შემოსვლებისა და გასვლების რაოდენობა 2019 წლის მონაცემებს მნიშვნელოვნად ჩამოუვარდება. კონკრეტულად შემოსვლების რაოდენობა 16.5%-ით ნაკლებია, ხოლო გასვლები 16.2%-ით.

III კვარტალში ყველაზე მეტი საზღვრის კვეთა რუსეთის ფედერაციიდან დაფიქსირდა, შესაბამისად, რუსეთმა უმსხვილეს ქვეყნებს შორის ამ მაჩვენებლებით პირველი ადგილი დაიკავა.

საზღვრის კვეთის მიხედვით TOP-10 მიმართულების რეიტინგი ასეთია:

რუსეთი: შემოსვლა - 766 278, გასვლა - 780 514;
თურქეთი: შემოსვლა - 551 107, გასვლა - 553 600;
სომხეთი: შემოსვლა - 451 809, გასვლა - 452 526;
ევროკავშირის ქვეყნები: შემოსვლა - 181 170, გასვლა - 182 244;
ისრაელი: შემოსვლა - 90 269, გასვლა - 89 921;
ყაზახეთი: შემოსვლა - 83 882, გასვლა - 84 948;
ბელარუსი: შემოსვლა - 77 570, გასვლა - 82 151;
აზერბაიჯანი: შემოსვლა - 74 301, გასვლა - 74 443;
უკრაინა: შემოსვლა - 65 408, გასვლა - 67 029;
საუდის არაბეთი - 56 716, გასვლა - 60 693.
აღნიშნულ პერიოდში შემოსვლების საერთო რაოდენობიდან 1 670 541 იმ შემოსვლებზე მოდის, რომლებიც ქვეყანაში 24 საათზე მეტ ხანს გაჩერდნენ, ტრანზიტით სულ 464 445 შემოსვლა, 24 საათამდე კი 544 320 შემოსვლა დაფიქსირდა.

 

წყარო: bm.ge